“துக்கம் அனுசரிக்கும் இடம் சர்க்கஸ் கூடமாக மாறியது” - இயக்குநர் பாக்யராஜ் மறைவில் நடிகை ராதிகா நெகிழ்ச்சி மற்றும் வேதனை!

“துக்கம் அனுசரிக்கும் இடம் சர்க்கஸ் கூடமாக மாறியது” - இயக்குநர் பாக்யராஜ் மறைவில் நடிகை ராதிகா நெகிழ்ச்சி மற்றும் வேதனை!

சென்னை: தமிழ் சினிமாவின் மூத்த இயக்குநரும், எழுத்தாளருமான கே.பாக்யராஜின் திடீர் மறைவு திரையுலகினரையும் ரசிகர்களையும் பெரும் சோகத்தில் ஆழ்த்தியுள்ளது. இந்நிலையில், அவரது இறுதிச்சடங்கு நிகழ்வுகளில் நிலவிய கூட்ட நெரிசல் மற்றும் சிலரின் பொறுப்பற்ற நடத்தையைக் கண்டு நடிகை ராதிகா சரத்குமார் தனது எக்ஸ் (X) தளப் பக்கத்தில் மிகுந்த வேதனையோடு கண்டனப் பதிவு ஒன்றை வெளியிட்டுள்ளார்.

50 ஆண்டுகால நட்பு - ராதிகா உருக்கம்:

இயக்குநர் பாக்யராஜுடனான தனது நீண்டகாலத் திரைப்பயணம் குறித்து நடிகை ராதிகா வெளியிட்டுள்ள பதிவில் கூறியிருப்பதாவது:

"மிகவும் சிறப்பான 50 ஆண்டுகால நட்பு எங்களுடையது. அவர் ஒரு சிறந்த படைப்பாளி, மூத்த எழுத்தாளர் மற்றும் சினிமாவில் அற்புதமான எல்லைகளை வகுத்தவர். பல மகிழ்ச்சியான தருணங்களையும், சிறந்த படைப்புகளையும் என்னுடன் பகிர்ந்துகொண்டவர். அமைதியான மற்றும் உறுதியான விசுவாசத்துடன் என் குடும்பத்திற்கு எப்போதும் துணையாக நின்றவர் அண்ணன் பாக்யராஜ். அவரது இந்த அதிர்ச்சிகரமான பிரிவு, அவரது குடும்பத்தினர், நண்பர்கள், சக கலைஞர்கள் மற்றும் ஒட்டுமொத்த ரசிகர்களுக்கும் மிகுந்த துயரத்தை அளிக்கிறது."

"நாம் ஏன் இவ்வளவு உணர்ச்சியற்றவர்களாக மாறினோம்?"

இறுதிச்சடங்கு நடந்த இடத்தில் நிலவிய அநாகரிகமான சூழலைச் சுட்டிக்காட்டி சாடியுள்ள ராதிகா, "அமைதியாகத் துக்கம் அனுசரிக்கப்பட வேண்டிய அந்த இடம், ஒரு சர்க்கஸ் கூடமாக மாறியது பார்ப்பதற்கு மிகுந்த வேதனையளிக்கிறது. நாம் எப்போது, ​​எப்படி இவ்வளவு உணர்ச்சியற்றவர்களாக மாறினோம்? என்று தெரியவில்லை" என ஆதங்கப்பட்டுள்ளார்.

அரசுக்கும் திரைத்துறைக்கும் கோரிக்கை:

பொதுமக்கள் மற்றும் சில யூடியூப் சேனல்களின் அத்துமீறல்களைக் கட்டுப்படுத்தக் கோரியுள்ள அவர், "இனிவரும் காலங்களிலாவது இதுபோன்ற பிரபலங்களின் இறுதி அஞ்சலி நிகழ்வுகளில் அசம்பாவிதங்கள் நடக்காமல் இருக்க அரசாங்கமும், திரைத்துறையும் (South Indian Film Chamber & Nadigar Sangam) ஒன்றிணைந்து செயல்பட வேண்டும். இதற்கென முறையான வழிகாட்டுதல்களை வகுத்து, உயிரிழந்தவர்களின் உடலுக்கும், அவர்களது குடும்பத்தின் தனிப்பட்ட துக்கத்திற்கும் உரிய கண்ணியத்தை உறுதி செய்ய வேண்டும்" என்று மிக அழுத்தமாகத் தெரிவித்துள்ளார்.