"அவசர நிலையின் இருண்ட காலத்தில் ஜனநாயகம் நசுக்கப்பட்டது" – பிரதமர் நரேந்திர மோடி மற்றும் துணை ஜனாதிபதி சி.பி. ராதாகிருஷ்ணன் கடும் சாடல்!

"அவசர நிலையின் இருண்ட காலத்தில் ஜனநாயகம் நசுக்கப்பட்டது" – பிரதமர் நரேந்திர மோடி மற்றும் துணை ஜனாதிபதி சி.பி. ராதாகிருஷ்ணன் கடும் சாடல்!

புதுடெல்லி: இந்திய வரலாற்றில் கடந்த 1975-ஆம் ஆண்டு ஜூன் 25-ஆம் தேதி பிறப்பிக்கப்பட்ட 'அவசர நிலை'யின் (Emergency) நினைவு தினத்தையொட்டி, பிரதமர் நரேந்திர மோடி மற்றும் துணை ஜனாதிபதி சி.பி. ராதாகிருஷ்ணன் ஆகியோர் அந்த இருண்ட காலத்தில் நாட்டின் ஜனநாயகம் நசுக்கப்பட்ட விதம் குறித்தும், தேசம் அனுபவித்த துயரங்கள் குறித்தும் தங்களது எக்ஸ் (X) சமூக வலைதளப் பக்கங்களில் கடுமையாகச் சாடியுள்ளனர்.

"அரசியலமைப்பின் மீதான நேரடித் தாக்குதல்" – பிரதமர் மோடி

அவசர நிலை பிரகடனப்படுத்தப்பட்ட நாளான நேற்று, அதன் இருண்ட பக்கங்களை நினைவு கூர்ந்து பிரதமர் நரேந்திர மோடி தனது எக்ஸ் (X) தளத்தில் பதிவிட்டிருப்பதாவது:

"அவசர நிலை என்பது நமது நாட்டின் புனிதமான அரசியலமைப்பின் மீது தொடுக்கப்பட்ட நேரடித் தாக்குதல் ஆகும். அந்த இருண்ட காலத்தில் குடிமக்களின் அடிப்படை உரிமைகள் முற்றிலும் இடைநிறுத்தப்பட்டன; கருத்துச் சுதந்திரத்தின் மீது கடுமையான கட்டுப்பாடுகள் விதிக்கப்பட்டன.

அதுமட்டுமன்றி, மக்கள் நலனுக்காகப் பாடுபட்ட முன்னணி அரசியல் தலைவர்கள், நேர்மையான பத்திரிகையாளர்கள் மற்றும் சமூக சேவகர்கள் ஆகியோர் அராஜகமான முறையில் கைது செய்யப்பட்டு சிறையில் அடைக்கப்பட்டனர். நமது இந்திய ஜனநாயகத்தின் வலுவான அடித்தளமாக விளங்கும் அனைத்து முக்கியத் தூண்களும், நிறுவனங்களும் அந்தச் காலகட்டத்தில் மிக மோசமான தாக்குதலுக்கு உள்ளாகின."

இவ்வாறு பிரதமர் மோடி அந்த நாட்களில் நாடு அனுபவித்த துயரங்களை வேதனையுடன் நினைவு கூர்ந்துள்ளார்.

"ஜனநாயகக் கட்டமைப்பு சீர்குலைக்கப்பட்டது" – துணை ஜனாதிபதி சி.பி. ராதாகிருஷ்ணன்

இதேபோல், துணை ஜனாதிபதி சி.பி. ராதாகிருஷ்ணன் அவர்களும் அவசர நிலை காலகட்டத்தின் அடக்குமுறைகளைக் கண்டித்துத் தனது எக்ஸ் (X) தளத்தில் பதிவிட்டுள்ளார். அவர் கூறியிருப்பதாவது:

"நமது நாட்டின் அரசியலமைப்பு மதிப்புகள் மிகக் கடுமையாகச் சோதிக்கப்பட்ட ஒரு காலத்தின் ஆழ்ந்த நினைவூட்டலாக இந்த நெருக்கடி நிலை (எமர்ஜென்சி) விளங்குகிறது. குடிமை உரிமைகள் தற்காலிகமாகப் பறிக்கப்பட்டன, மக்களின் சுதந்திரமான கருத்துச் சுதந்திரம் ஒடுக்கப்பட்டது. மேலும், நமது துடிப்பான ஜனநாயகக் கட்டமைப்புக்கு மையமாக விளங்கும் அனைத்து உன்னத நிறுவனங்களும் அந்தச் சமயத்தில் திட்டமிட்டுச் சீர்குலைக்கப்பட்டன."

இந்திய ஜனநாயக வரலாற்றின் கருப்பு அத்தியாயமாகக் கருதப்படும் 1975 அவசர நிலை பிரகடனத்தின் நினைவு தினத்தில், நாட்டின் மிக உயரிய பதவிகளில் உள்ள தலைவர்கள் இந்த அடக்குமுறைகளைத் திரும்ப நினைவு கூர்ந்து, ஜனநாயகத்தைப் பாதுகாக்க வேண்டியதன் அவசியத்தை வலியுறுத்தியுள்ளது அரசியல் அரங்கில் முக்கியத்துவம் பெற்றுள்ளது.